ఎఱిగితి నమ్మితి - అన్నమయ్య కీర్తన

ఎఱిగితి నమ్మితి నితడు దయానిధి
మఱగులు మొరగులు మరియిక లేవు

వేదోద్ధరణుడు విశ్వరక్షకుడు
ఆదిమూర్తి శ్రీఅచ్యుతుడు
సోదించి కొలిచితి సుముఖుడై మమ్మేలె
యేదెస మాపాల నితడే కలడు

పరమపురుషుడు ఆపన్నివారకుడు
హరి శాంతుడు నారాయణుడు
శరణంటి మితడు చేకొని కాచెను
తరవాతి పనులఁ దప్పడితడు

హృదయాంతరంగుడు యీశ్వరేశ్వరుడు
ఇదివో శ్రీవేంకటేశ్వరుడు
వెదకితి మీతడు విడువడు మమ్మిక
తుదకును మొదలికి దొరికినవాడు